جيمي النووي

بابا بابا ممكن العب بالنووي؟”

هكذا هتف في بلاهة متناهية الأمير جيمي ولي عهد بلاد مباركستان

التفت إليه الملك المبارك مبروك في دهشة قائلا : “نووي ؟! نووي ايه ده اللي هتلعب بيه؟”
جيمي : “النووي يا بابا النووي ، بتاع البتاعة اللي بتفرقع في البتاع ده”
ابتسم الملك في حنان و قال لنفسه :”يا حبيبي يا جيمي طالع لابوك ، قوام اتعلمت لغة البتاع ده”
ثم اعتدل في حزم مستعيدا هيئة الصرامة : “انت مالك و مال النووي يا جيمي؟!”
جيمي :” يادادي افهمني ، الناس مش راضية تحبني و لا تهتفلي ، مش نازلهم من زور
مع اني عملت كل حاجة
متشات و حضرت (صحيح كل مرة احضر المنتخب يخسر بس مش دي القضية يعني)
دورات رمضانية و لعبت لما اتقطع نفسي
جمعيات و عملت
تصريحات و شغال زي الاسهال
و برضه مفيش فايدة
قلت يا واد يا جيمي ايه اللي يخلي الشعب يحبك
قعدت افكر و بعدين شفت عمو نجادي في التيلفيجن
قلت بس
هو النووي اللي يخلي الشعب يقول علي جبار
و يهتف لي يا جمال يا جبار انت البغل و ابوك حمار ”
مبروك في غضب : “حمار ايه يابن الهبلة ، انت عبيط ياد؟”
جيمي يبدأ في البكاء ، فيرق قلب مبروك و يهمس في حنان
“يا جيمي يا حبيبي انت عارف اني معزش عنك حاجة ابدا
و عارف ان المملكة كلها تحت أمرك ، و الشعب كله ملك ايديك
لكن موضوع النووي ده مينفعش ، ده يزعل منك عمك بوش ، و احنا مش قد زعله”
يبكي جيمي “مليييش دعوة انا عايز النووي ، اعااااااااااااااااااااااااااا”
مبروك في توتر : “متفتحش الجاعورة لأمك تسمع و تبقى ليلتنا زرقا”
تدخل سوزي في لهفة :”مالك يا جيمي يا حبيبي بتعيط ليه”
يبدأ مبروك في الانكماش في مقعده استعدادا لهجوم لا يصد و لا يرد
جيمي ينظر إلى أبيه في تشف :” دادي مش عايز يخليني ألعب يا مامي”
سوزي : “جرى ايه يا مبروك انت كل شوية هتزعلي الواد و تخليه يعيط ، انت عايز تضيع مني ابني”
مبروك : “يا حبيبتي افهمي الموضوع الاول ، الواد عايز يلعب بالنووي”
سوزي : ” و ماله ، انا ابني يلعب في اللي هو عايزه ”
مبروك : “انتوا شكلكوا اتجننتوا انتو الاتنين انتوا عايزين تقلبوا علي بشبوشتي”
سوزي :”جن لما يلهفك انت نسيت نفسك و لا ايه”
مبروك : “انتي شكلك كبرتي و خرفتي”
سوزي :”كبرت ايه يا راجل يا مكحكح ، لا اصحى و فوق كده ، انت فاكرني من الشعب الأهبل اللي بتضحك عليه
بصور قديمة بتتنشر في الجرايد بقالها 10 سنين ، يا راجل ده انت مش قادر تصلب طولك”
مبروك متراجعا :”كده يا سوزي مكنش العشم ”
سوزي: “و اذا كان على بشبوش سيبلي انا الحكاية دي ، انا هكلم ابله كوندي ، انت عارف انه ميقدرش يردلها كلمة”
مبروك :” طب و هتقوليها ايه بس”
سوزي :”ملكش دعوة انت ، دي حاجات ستات في بعض ، اطلع انت منها”
مبروك في غضب :”يعني ايه اطلع انا منها ، انتي نسيتي انا مين ، انا الملك”
سوزي :”طز ، انا اللي قلته يتسمع ”
مبروك:” طب ايه رأيك بقى اني مش موافق ، و انا كلمتي واحدة و مش هتنزل الأرض أبدا”
سوزي:”مبروووووووووووووك”
مبروك:” خلاص هتنزل المرة دي”
يسكت للحظات ثم يبدو عليه أنه تذكر شيئا فيلتفت إليها مرة أخرى
“بقلك ايه متنسيش توصيلي كوندي على علبة فياجرا مستوردة زي بتاعة آخر مرة”
—————————————————————–
روابط لا علاقة لها بتاتا بالموضوع

البتاع ده

النووي

Advertisements

10 thoughts on “جيمي النووي

  1. اشطااااااااااط
    هايل اللي انت بتقوله ده
    بس نصيحة تبوس راس الحاجة وقولها تدعيلك والسيد الةالد واصحابك واحد واحد ويادوب نلحق نشوفك والعيش والحلاوة علينا

  2. لا يابنى …
    لا تبوس راس الحاجه … ولا تطلب منها إنها تدعى لك …
    ما تخوفيهوش يا لمياء …. الموضوع عادى جدا وسط كل اللى بيتنشر عن مبارك وإبنه …
    يعنى هما هيزعله ليه لما نقول عليهم الحق ؟؟
    بس بصراحة مقالك رائع جدا … صحيح أنا ما أقدرش أجاريك فى أسلوب السخرية بتاعك لكن أنا إكتشتفت من خلال الكلام اللى إنت كاتبه أن فيه حاجات ممكن نوصلها للناس عن طريق الهزل برضه …

  3. مثلما أقول دائما
    الكتابة الساخرة من اصعب انواع الكتابات
    فالكاتب يكون على شعرة بين الابتذال و الافتعال
    بسهولة جدا يمكن ان تضيع الفكرة بينهما

    و لكني اراك تتحرك بحرية فى مساحة تلك الشعرة و كأنها في عرض الاتوستراد 🙂

    و هذا مالا يستطيع فعله الكثيرون

    مقال رائع

    ساخر و لكن سخرية في الصميم … تجعل معالجة اصعب الموضوعات .. يتم بسلاسة بالغة

    تحياتي لك .. و ننتظر منك المزيد

  4. اذن قشطة
    رؤساء اخر زمن صحيح

    انا طول عمري باقول
    البلد دي ما بقتشي بلد شهدات خلاص

    الوزير فيها بيتعين بالابتدائية

    وسلمي ع الشـفتشي
    يوه قصدي الشفافية

  5. ***لا حول ولا قوة الا بالله العلى العظيم…اللهم أغفر
    وأرحم وانت خير الراحمين…اللهم افرغ علينا من لدنك صيراَ ورحمة وانت خير خير الراحمين…اللهم أستر عورتنا وآمن روعتنا وثبتنا وانصرنا على القوم الظالمين…وبلغنا الحج والعمرة والشهادة..وصلى الله على سيدنا مححمد وعلى اله وصحبه وسلم

  6. دعوة إفطار للمدونين المصريين

    الدعوة مفتوحة وعامة لكل المدونين المصريين

    الافطار هايكون بنظام الديش بارتى كل واحد يجيب اكل معاه وكلنا ناكل مع بعض

    كل واحد يدعوا كل المدونين اللى يعرفهم بنفسه، نتعرف على بعض ونأكد على

    اجمل حاجه فى التدوين ، روح التدوين اللى ممكن تجمعنا كلنا

    المكان المرة دى مش هايكون مطعم ولا فندق ولا غيرة

    هانفطر فى المكان الوحيد اللى المفروض نفطر فيه

    ســـوق الأســرة

    مشروع متميز لمجموعة شباب زينا ، بيشتغلوا ويقدموا خدمة حقيقية و واقعية

    للمجتمع ، بشكل حضارى ومبتكر،

    يقدم السلع باسعار مخفضة، عن طريق اختصار الوكلاء

    السوق بيساعد الفقراء وبيشغل العاطلين و بيضرب مثل على العمل التعاونى

    والتضامنى وقدرة الشباب على

    الاعتماد على انفسهم

    التجربة رائدة ومحتاجه تضامن من الجميع

    تم الاتفاق مع مجوعة ادارة السوق على موعد يوم الخميس القادم 19 اكتوبر

    عنوان السوق : سوق الاسرة 288 ش السوادان المهندسين القاهرة

    ماتنسوش الدعوة عامة واليوم بتاعنا كلنا ، كلنا هاندعوا بعض

    هانفطر سوا كلنا

    الخميس القادم 19 اكتوبر فى سوق الاسرة

    فكرة وتنظيم

    نورا يونس و أيــــــوب المصرى
    ****
    🙂 لا اعلم بصراحة تفاصيل اكثر عن الموضوع و لكن يمكنك ان ترسلها الى جميع من تعرفهم من المدونين

    ***
    تحياتي

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s